O think tank do BNG, a Fundación Galiza Sempre, presenta o xoves 2 de xuño ás 20 horas no Café Cultural Auriense o último caderno da súa colección Ideas Impresas. Este novo número está dedicado á historia do movemento LGBT+ organizado en Galiza. Un documento elaborado polos activistas e estudosos Alexandre Garrido e Daniela Ferrández, ámbolos dous militantes do nacionalismo galego investigadores académicos. Os dous son membros desde a súa fundación da Rede Galega de Estudos Queer e do espazo de pensamento crítico galego Clara Corbelhe.

• Alexandre Garrido (A Estrada, 1991) biólogo, antropólogo en formación e doutorando en Educación na Universidade de Santiago de Compostela, cun proxecto de tese sobre a reprodución social da LGBTfobia. Foi un dos integrantes do colectivo Queercompostela e impulsou a fundación de Avante LGBT+, onde, na actualidade, forma parte da Coordinadora Nacional como Responsábel de organización.

• Daniela Ferrández (Almoradí, Paiís Valencià 1988) doutora en Historia Contemporánea pola Universidade de Santiago de Compostela (2020), é investigadora posdoutoral no eido da Historia e a Memoria da disidencia sexual na Galiza contemporánea. En 2022 publicou A defunción dos sexos: disidentes sexuais na Galiza contemporánea (Xerais), obra que gañou o Premio Follas Novas de Ensaio en 2023. Nestes anos,desenvolveu diferentes proxectos de divulgación e recuperación destas memorias. É, desde nova, activista pola recuperación da memoria antifascista, e, en paralelo, activista trans que ten colaborado con diferentes asociacións LGBT+ do país.

O caderno explora o mito fundacional do movemento, dando unha lectura crítica e desmitificada das revoltas que aconteceron aquel xuño do 69 en Nova York, así como a relación entre estes e a organización de movemento de liberación LGBT+ ao redor do planeta.

Ademais analiza o contexto histórico, político e social en que a Galiza dos anos 70 recibiu estes ecos e como as activistas beberon de múltiples fontes e teceron alianzas para sacar adiante as primeiras mobilizacións. A través da obra ollaremos como unha serie de organizacións naceron, forxaron lazos, racharon, desapareceron e deron paso a novos grupos que continuaron a loita ao longo das décadas seguintes.

O caderno recorda o impacto que a pandemia da SIDA tivo sobre o colectivo, a capacidade para organizarse e a necesidade de repensar estratexias e prioridades naqueles anos de ‘transición’, de saída da clandestinidade do nacionalismo galego e de emerxencia dos movementos feministas, ecoloxistas e estudantís.

Nas últimas seccións, analiza sobre a viraxe política que supuxeron as loitas pola Lei de Matrimonio Igualitario e a Lei de Cambio de Nome e Sexo xa no novo milenio, do papel que desempeñaron as institucións na construción dun novo marco legal e social e sobre que podemos aprender destas transformacións en retrospectiva.

Na presentación participará a un dos seus autores, Alexandre Garrido e Ximena González, feminista e activista polos dereitos LGBT+.

O público asistente poderá levar de balde un exemplar da publicación.