O Centre Maurits Coppieters (CMC), a fundación da Alianza Libre Europea (partido no que se integra o BNG) celebrou o 15 e 16 de xuño a súa asemblea anual en Szováta para testemuñar o seu apoio ás reivindicacións de autonomía da Transilvania incluída en Rumanía. Na conferencia pública sobre autogoberno celebrada con este motivo participaron, canda Xabier Macias, director da Fundación Galiza Sempre e presidente do CMC: Lorena López de la Calle, deputada por Bildu en Araba (na foto); Josep Huguet, presidente da fundació Irla (ERC); Roccu Garoby, representante da revista corsa Arritti e presidente de EFA youth; e László Tokés, eurodeputado e presidente do Consello Nacional Húngaro de Transilvania.

CMC aprobou o seu plano de actuación que contempla no inmediato, entre outros proxectos, un atlas xeopolítico das nacións sen estado europeas e un estudo sobre alternativas ao actual sistema de gobernanza económica na Unión Europea. Na asemblea presentouse a última publicación editada: “The ascent of autonomus nations”.

O Centre Maurits Coppieters, que leva o nome do primeiro eurodeputado da ALE, elexido en 1979, comezou a súa andaina en 2008 e agrupa xa 14 entidades de sete estados membros. A Fundación Galiza Sempre estivo representada polo seu novo presidente, Xesús Veiga, quen informou ao CMC da renovación do Padroado e das principais actividades realizadas por FGS nos últimos meses.

http://www.cmc-foundation.eu