A Fundación Galiza Sempre e Mar de Lumes colaboran coa editorial Caminho na presentación do libro A Guerra a Leste. 8 meses no Donbass, o primeiro libro do xornalista Bruno Amaral de Carvalho.

As presentacións terán lugar o xoves 9 ás 20h na Libraría Cartabón (Vigo), o venres 10 ás 19:30h na Casa do Taberneiro (Compostela) e o sábado 11 ás 12h na A.C Alexandre Bóveda (A Coruña).

Bruno relata no libro as súas experiencias como xornalista de guerra no Donbass, onde, durante oito meses acompañou o conflito ucraíno. Nese tempo tivo ocasión de seguir os acontecementos máis importantes, en particular, o da batalla de Mariupol. Visitou prisións, acompañou os referendos e estivo na central nuclear de Enerdogar.

Nesta obra cóntanos o que viviu e sentiu nun dos lados da guerra, que os medios de comunicación occidentais pouco seguen ou prefiren non ver. Foi, en varios momentos, o único xornalista traballando para os órganos da comunicación social occidental nos territorios controlados polas forzas rusas.

Nesta obra recolle os dilemas humanos, os sufrimentos da poboación civil, o que é correr riscos permanentes ou a ameaza de minas e bombas, cóntanos en definitiva o que é vivir no limbo sendo correspondente de guerra.

O autor do libro traballou para medios como a CNN Portugal, Contacto (Luxemburgo), EiTB e Gara (Euskal Herria), Nós Diario (Galiza) ou a Voz do Operário (Portugal). Viviu en Venezuela en 2008, país ao cal regresou 5 veces e onde foi testemuña da efervescencia social e das tentativas de golpe de Estado, colabora con varias radios comunitarias. Coñece en profundidade a realidade política do soberanismo vasco, galego e catalán. En 2017 pasou un mes entre a guerrilla das FARC, nas montañas de Colombia. Ao seguinte ano visitou por vez primeira o Donbass en plena guerra civil, e voltaría en 2022, sendo en moitas ocasións o único xornalista occidental en cubrir o conflito do outro lado.